گر چہ ہم جا رہے ہیں محفل سے نالۂ دل فِگار بن کر ؛
اگر چہ ہم جا رہے ہیں محفل سے نالۂ دل فگار بن کر
مگر یقیں ہے کہ لٙوٹ آئیں گے نغمہ نو بہار بن کر۔
یہ کیا قیامت ہے باغبانو! کہ جن کی خاطر بہار آئی
وہی شگوفے کھٹک رہے ہیں تمہاری آنکھوں میں خار بن کر۔
جہان والے ہمارے گیتوں سے جائزہ لیں گے سسکیوں کا
جہان میں پھیل جائیں گے ہم بشر بشر کی پکار بن کر۔
بہار کی بد نصیب راتیں بُلا رہی ہیں چلے بھی آؤ،
کسی ستارے کا روپ لے کر، کسی کے دل کا قرار بن کر۔
ضرورتِ راہ کے مطابق مسافروں نے بھی سیکھ لی ہے
وہ رہزنی مُدّتوں رہی ہے جو رہبروں کا شِعار بن کر۔
تلاشِ منزل کے مرحلوں میں یہ حادثہ اِک عجیب دیکھا
فریب راہوں میں بیٹھ جاتا ہے صورتِ اعتبار بن کر۔
غرورِ ہستی نے مار ڈالا وگرنہ ہم لوگ جی ہی لیتے
کسی کی آنکھوں کا نُور ہو کر، کسی کے دل کا قرار بن کر۔
دیارِ پیرِ مغاں میں آ کر یہ اِک حقیقت کُھلی ہے ساغر
خدا کی بستی کے رہنے والے تو لُوٹ لیتے ہیں یار بن کر۔
(ساغر صدیقی)
اِبنُ الاٙشرٙف