کاش سمجھے مرا سوزِ غمِ پِنہاں کوئی؛
کاش سمجھے مرا سوزِ غمِ پِنہاں کوئی
گل کرے آ کے چراغِ تہِ داماں کوئی۔
زلزلوں سے نہ لحد کے ہو پریشاں کوئی
ڈال دے قبر پہ خاکِ درِ جاناں کوئی۔
اُس سے ہم کہتے ہیں ملتا ہے جو انساں کوئی
کہ تری شکل میں پِنہاں ہے مری جاں کوئی۔
اللّٰہ اللّٰہ رے مرے غم کدہِ دل کی بہار
آج اُسی اُجڑے ہوئے گھر میں ہے مہماں کوئی۔
حشر کے دن کی درازی کا بٙھرم کُھل جائے
دیکھ لے آ کے جو طُولِ شبِ ہجراں کوئی۔
داغ ہائے غمِ جاناں سے ہے سینہ گلزار
باغِ عالٙم میں ہے فردوس بداماں کوئی۔
ناوک انداز تجھے اپنی اداؤں کی قسم
ترکشِ ناز میں رہ جائے نہ پیکاں کوئی۔
ذرّہ ذرّہ ہے رہِ عشق کا صحرائے جنوں
دشت مجنوں ہے بیاباں میں بیاباں کوئی۔
لاکھوں آزادیاں اس ایک اسیری پہ نثار
آئے پہنچانے کو جب تا درِ زِنداں کوئی۔
شانِ رحمت کے لیے حیلہِ بخشش مل جائے
بات اتنی ہے کہ ہو جائے پشیماں کوئی۔
پردہِ ہستیِ موہوم اُٹھا دے بیدم !
دیکھے پھر تیری طرح جلوہِ جاناں کوئی۔
(بیدم شاہ وارثی)
اِبنُ الاٙشرٙف