اِلٰہی ! مُطمئن ہوں گے نہ اب گُلشن میں ہم کب تک

اِلٰہی ! مُطمئن ہوں گے نہ اب گُلشن میں ہم کب تک،،،،

فضائے رنگ و بُو کے یہ کرِشمے دَم بدَم کب تک۔۔۔۔

تمہِیں کہہ دو ، ہمیں رہنا ہے محرومِ کرم کب تک،،،،

بھروسہ کیا ہے اِس دُنیا میں، تم کب تک ہو، ہم کب تک۔۔۔۔

ہمیں چکرائیں گے دیر و حرم کے پِیچ و خم کب تک،،،،

یونہی پھرتے رہیں گے اِن گُزر گاہوں میں ہم کب تک۔۔۔۔

مُحبت مُطمئن ہے صبر کے مضبوط حلقے میں،،،،

مگر اب کیا کہیں ، جاری رہے رسمِ سِتم کب تک۔۔۔۔

مآلِ کار ، دل کو ہے گرفتارِ بٙلا ہونا،،،،

کوئی سلجھائے گا آخِر تیری زُلفوں کے خم کب تک۔۔۔۔

ہمارا تذکرہ بھی شاملِ تاریخ ہونا ہے،،،،

مگر دیکھیں کہ چلتا ہے مؤرِّخ کا قلم کب تک۔۔۔۔

ہوس کو چھوڑ دے ، شانِ قناعت خود میں پیدا کر،،،،

غمِ سُود و زِیاں کیوں ، اور فکرِ بیش و کم کب تک۔۔۔۔

کیا ہے وعدہ آنے کا ، مگر اب یہ خبر کس کو،،،،

وہ کب آئیں ہمارے گھر، وہ فرمائیں کرم کب تک۔۔۔۔

میرے پیمانۂ فِکر و نظر کا ذِکر ہو ساقی،،،،

رہے گی میکدے میں داستانِ جامِ جم کب تک۔۔۔۔

کوئی تسکینِ دل کی شکل اب نکلی ، نہ جب نکلی،،،،

نصیر آخر محبت میں پریشاں ہوں گے ہم کب تک۔۔۔۔

(پیر نصیر الدین نصیر)

(نوٹ)

گلشن : “باغ”۔

کرشمے : “معجزے”۔

پیچ و خم : “مشکلات/ پیچیدہ معاملات”۔

رنگ و بو : “رونق/ بہار”۔

مؤرخ : “تاریخ دان”۔

سود و زیاں : “نفع و نقصان”۔

جامِ جم : “حکمائے فارس کا پیالہ”۔

(اِبنُ الاٙشرٙف)