عشقِ بے پایاں کا حاصل اور ہے
عشقِ بے پایاں کا حاصل اور ہے،،،،
شوقِ منزِل اور ، منزِل اور ہے۔۔۔۔
دے کے دل اُن کو یہ مشکل اور ہے،،،،
روز کہتے ہیں، کوئی دل اور ہے؟۔۔۔۔
عقل والے اپنی اپنی راہ لیں،،،،
اُن کے دیوانے کی منزل اور ہے۔۔۔۔
کیا عجب محشر میں یہ کہنا پڑے،،،،
وہ نہیں ہیں، میرا قاتل اور ہے۔۔۔۔
ناخدا ! تو نے کہاں پہنچا دیا،،،،
یہ تو ہے منجدھار، ساحل اور ہے۔۔۔۔
ہجر سے چھوٹے تو زلفوں میں پھنسے،،،،
اک بلا اب سر پہ نازل اور ہے۔۔۔۔
حضرتِ واعظ ! یہاں سے جائیے،،،،
میکدے میں رنگِ محفل اور ہے۔۔۔۔
آئینے کو دیکھ کر شرمائے کیوں؟،،،،
کیا کوئی مدِ مقابل اور ہے؟
تم سے پِھر جائے ، یہ ممکن ہی نہیں،،،،
غیر کا ہوگا ، میرا دل اور ہے۔۔۔۔
آپ کو ضد ہے تو پھر یوں ہی سہی،،،،
آج سے اب اپنی منزل اور ہے۔۔۔۔
اگلے لوگوں کی کہاں باتیں نصیر !،،،،
اب زمانہ اور ، محفل اور ہے۔۔۔۔
(پیر نصیر الدین نصیر)
(نوٹ)
بے پایاں : “لا محدود”
منجدھار : “طوفان/تلاطم”
(ابن الاشرف💓)