میں اور حُسنِ یار کا جلوہ لیے ہوئے
میں اور حُسنِ یار کا جلوہ لیے ہوئے،،،،
ذرّہ ہے دلفریبئ دنیا لیے ہوئے۔۔۔۔
ویران دل کا آنکھوں میں نقشہ لیے ہوئے،،،،
صحرا میں پِھر رہا ہوں میں صحرا لیے ہوئے۔۔۔۔
دردِ فِراق، زخمِ جِگر، داغ ہائے دِل،،،،
آیا ہوں اُن کی بٙزم سے کیا کیا لیے ہوئے۔۔۔۔
کیونکر کروں نہ سجدہ رہِ کُوئے یار میں،،،،
ہر ذرّہ ہے تجلّیِ کعبہ لیے ہوئے۔۔۔۔
بُت خانے سے غرض ہے نہ مسجد سے واسطہ،،،،
پِھرتی ہے مجھ کو تیری تمنا لیے ہوئے۔۔۔۔
جس شاخ پر چمن میں بنایا تھا آشیاں،،،،
بجلی گِری اُسی کا سہارا لیے ہوئے۔۔۔۔
آنکھوں میں پِھر رہا ہے جمالِ منیر دوست،،،،
غٙش ہیں کلیم برقِ تجلّی لیے ہوئے۔۔۔۔
دنیا سے بے نیاز، زمانے سے بے خبر،،،،
بیدم ہے تیرا تیری تمنا لیے ہوئے۔۔۔۔
(بیدم وارثی)
نوٹ :
دردِ فِراق : (جدائی کا دکھ)۔
جمالِ منیر : (روشن چہرے کی دلکشی)۔
برقِ تجلّی : (دیدار کی جھلک)۔
(اِبنُ الاٙشرٙف)